一年一度護士節
從來，護士都不被常人重視。
我響分流站，見阿伯一個星期嚟兩次都係睇氣促：
「阿伯呀，食少啲煙啦！一日食兩包，好難唔氣促架！」我用盡聲線，響佢無咁聾嗰邊耳仔講。
「吓？我X你老母！叫我唔食？！不如叫我死咗去啦！你憑咩話我？！你係醫生咩？！」
我俾咗條「貓鬚」（nasal cannula 氧氣鼻導管），送咗2度氧氣佢聞住入去見醫生。
入到醫生房，醫生同我講同一番說話，阿伯就死狗咁：
「哎呀醫生，我會食少啲架啦。你真係好，真係會關心病人！多謝你呀醫生！」
係～
我哋讀書唔夠多、唔夠好，
但係，其實當你知道，睇醫生，只係嗰三五分鐘，而你：
換衫、
換褊、
屙屎屙尿、
沖涼、換床單、
打針、派藥、洗傷口、
縫針、抽血吊鹽水、
叫X光佬急急腳嚟幫你照肺、
提阿醫生打呢樣藥打嗰樣藥、
安排入院出院、
聯絡家屬、
安排「勞屍來屍」、
同攞刀斬老豆老婆隔離屋嘅癲佬搏鬥、
同急症室/病房嘅病人厠所塞咗都關我哋事，你就知，我哋（護士）同醫生一樣，同樣重要。
護士節，唔係想大家要做啲乜嘢去多謝我哋，我只係想大家，唔好成日「問候」我哋啲屋企人，而且多謝醫生嘅同時，都希望你都多謝每一位照顧過你、幫助過你嘅護士。
一句多謝，好比力量，令我哋繼續努力加油！
祝各位同業，護士節快樂！
Search